Արարատյան Հայրապետական թեմի առաջնորդական փոխանորդ գերաշնորհ Տ. Նավասարդ արքեպիսկոպոս Կճոյանի տնօրինությամբ տեղի են ունեցել թեմի մի քանի հոգևորականների տեղափոխություններ:Արժանապատիվ Տեր Դանիել քահանա Բաղումյանն ազատվել է «Արարատ» երիտասարդաց միության հոգևոր հովվի պարտականություններից և նշանակվել Սուրբ Հովհաննես եկեղեցում՝ որպես խորհրդակատար քահանա: «Արարատ» երիտասարդաց միության հոգևոր հովիվ, Արարատյան թեմի երիտասարդաց միությունների ընդհանուր պատասխանատու և առաջնորդանիստ Սուրբ Սարգիս եկեղեցու խարհրդակատար քահանա է նշանակվել արժանապատիվ Տեր Պետրոս ավագ քահանա Մալյանը՝ ազատվելով Սուրբ Երրորդություն եկեղեցու ծիսակատար քահանայի պաշտոնից: Սուրբ Զորավոր եկեղեցու հոգևոր հովիվ արժանապատիվ Տեր Վարդան քահանա Մկրտչյանը տեղափոխվել է Նոր Նորքի Սուրբ Սարգիս եկեղեցի՝ որպես խորհրդակատար քահանա: Սուրբ Զորավոր եկեղեցու հոգևոր հովիվ է նշանակվել արժանապատիվ տեր Գրիգոր քահանա Գրիգորյանը, ով նախկինում ծառայում էր Սուրբ Երրորդություն, ապա՝ Ս. Հովհաննես եկեղեցիներում: Արժանապատիվ Տեր Թովմա քահանա Անդրեասյանը Նոր Նորքի Սուրբ Սարգիս եկեղեցուց տեղափոխվել է Նորքի Սուրբ Աստվածածին եկեղեցի: Արժանապատիվ Տեր Անուշավան քահանա Կոշեցյանը Սուրբ Զորավոր եկեղեցուց տեղափոխվել է Սուրբ Երրորդություն եկեղեցի: Էրեբունու համայնքի Սուրբ Մաշտոց եկեղեցու հոգևոր հովիվ արժանապատիվ Տեր Զգոն քահանա Աբրահամյանը համատեղության կարգով կսպասավորի նաև Սուրբ Զորավոր եկեղեցում:

21.08.2013.Մամլո դիվան