Երեկ՝ սեպտեմբերի 19-ին, Արարատյան Հայրապետական Թեմի Առաջնորդարանի դահլիճում թեմի երիտասարդական կառույցների հոգևոր հովիվ արժանապատիվ տեր Պետրոս քահանա Մայիլյանի նախաձեռնությամբ երիտասարդները հանդիպեցին թեմի առաջնորդ գերաշնորհ տեր Նավասարդ Արքեպիսկոպոս Կճոյանին: Տարբեր միությունների երիտասարդներ, այդ թվում և Սբ. Երրորդություն եկեղեցու խուլերի համայնքի շնորհալիներ, իրենց փոքրիկ, բայց բովանդակալից ստեղծագործություններով շնորհավորեցին սրբազան հորը՝ ծննդյան օրվա կապակցությամբ: Հանդիպման ավարտին իր օրհնության խոսքը երիտասարդներին հղեց սրբազանը: Մասնավորապես նշեց, որ, անկախ հանդիպման առիթից, ուրախ է, որ երիտասարդները համախմբված են, միասնական ու նպատակասլաց: Նաև, քանի որ առաջնորդական փոխանորդը նոր էր վերադարձել Մոսկվայից, որտեղ մասնակցում էր հայկական Սուրբ Պայծառակերպություն նորակառույց եկեղեցու բացմանը, կիսվեց իր տպավորություններով և ուրախությամբ: Վերջում երիտասարդները ստացան Սրբազան Հոր օրհնությունը և բաժանվեցին՝ բուռն թափով աշխատելու և կրկին հանդիպելու ակնկալիքով: