«Դարձէք ինձ ձեր ամբողջ սրտով»

Այսօր՝ փետրվարի 28-ին Հայ Առաքելական Եկեղեցին մտնում է Մեծ պահքի շրջան։ Հավատավոր մարդու համար պահոց շրջանը մարմնական զսպվածության, աշխարհիկ հաճույքներից հրաժարվելու և աղոթքի միջոցով Աստծուն մերձենալու, Նրա բարեհաճությանն արժանանալու և երբեմնի կորցրած Դրախտը վերագտնելու հնարավորություն է:  Մեծ պահքին հաջորդում է Սուրբ Հարության տոնը՝ հնչում է մեծագույն ավետիսը քրիստոնյաներիս կյանքում։

Սակայն շատ կարևոր է նաև իմանալ որոշ կանոններ՝ պահք պահելու վերաբերյալ, որոնք հնարավոր է՝ մեզ օգնեն պահքի այս շրջանում։

Ի՞նչ է խորհրդանշում պահքի 40 օրը

Պահքի 40 օրը խորհրդանշում է անապատում Քրիստոսի քառասնօրյա աղոթքի, ծոմապահության և ապաշխարության շրջանը: Եկեղեցին Քրիստոսի   օրինակին   հետևելով`   հաստատեց   քառասնորդական պահքը, որը կոչվում է նաև Մեծ Պահք: 

Կանոններ, որոնց պետք է հետևենք պահքի շրջանում

Մեծ Պահքի ընթացքում կարևոր է հավատացյալի կանոնավոր մասնակցությունը Ս. Պատարագներին, առավոտյան և երեկոյան ժամերգություններին: Կարևոր է նաև մասնակցությունը Խոստովանության կարգին: Խորհուրդ ենք տալիս Մեծ Պահքի ընթացքում Ավետարան, եկեղեցու հայրերի ապաշխարության աղոթքներն ընթերցել: Զղջումը, աղոթքն ու ապաշխարությունը ուղեկից է մեզ ողջ պահքի շրջանում։

Ինչի՞ց ենք հրաժարվում պահքի շրջանում

Պահքի ընթացքում հրաժարվում են ոչ միայն որոշակի կերակուրներից, ինչպես մեզ քաջ հայտնի է, այլև մոլի սովորություններից, շատախոսությունից, ստախոսությունից, հայհոյանքից և այլ մեղքերից:

Կերակրից հրաժարվելն առանց մեղքից հետ կանգնելու` անօգուտ է: «Սատանան միշտ պահքիմեջ է, ոչինչ չի ուտում, բայց մեղք գործելուց չի դադարում և չի հոգնում», - ասում է Ս. Գրիգոր Տաթևացին: «Լեռան քարոզում» Քրիստոս պահքի մասին ասում է. «Երբ ծոմ պահեք, տրտմերես մի լինեք կեղծավորների նման, որոնք իրենց երեսներն այլանդակում են, որպեսզի մարդկանց այնպես երևան, թե ծոմ են պահում, ճշմարիտ եմ ասում ձեզ, այդ իսկ է նրանց վարձը, այսինքն` մարդկանց երևալը և նրանցից գովվելը: Այլ երբ դու ծոմ պահես, օծի քո գլուխը և լվա քո երեսը, որպեսզի չերևաս մարդկանց ծոմ պահող, այլ քո Հորը, գաղտնաբար, և քո հայրը, որ տեսնում է, ինչ որ ծածուկ է, կհատուցի քեզ» (Մատթ. 6:16-18): 

Պսակի, Մկրտության ու մատաղի խորհուրդները՝ Մեծ պահքի շրջանում

Մեծ Պահքի ընթացքում սովորաբար պսակադրություն չի կատարվում, սակայն հաշվի առնելով մարդկանց անտեղյակությունը և այն, որ շատերն առանց իմանալու նախապատրաստվում են պսակադրությանն ու հնարավոր չէ տեղափոխել պսակի օրը՝ եկեղեցին ընդառաջում է և կատարում է պսակը՝ նախընտրելով օրհնել զույգերին և բացառել առանց օրհնության ընտանիք կազմելու հանգամանքը: Իրականում, սխալ է պահքի ժամանակ պսակվել, սակայն այս հարցում եկեղեցին առաջնորդվում է ոչ թե եկեղեցական կանոնների հրամայականով, այլ՝ հովվական խնամքի:

Մեծ Պահքի ընթացքում մատաղ չի կարելի անել, իսկ մկրտություն կարելի է: Մկրտության համար տարվա ընթացքում ոչ մի արգելված օր չկա:

Սուրբ Հաղորդություն կարո՞ղ եմ ստանալ

Պահքի ժամանակ Սուրբ Հաղորդություն չի տրվում՝ բացառությամբ այն դեպքերի, երբ բաց Խորանով Պատարագ է մատուցվում:

Կա՞ն մարդիկ, ում չի կարելի պահք պահել

Այո՛, կան։ Նրանք են երեխաները, հղի կանայք, հիվանդներն ու կերակրող մայրերը։

Փորձե՛նք անխախտ պահել մեր պահքը՝ շարունակ ուղեկցելով այն աղոթքով, զղջումով ու ապաշխարությամբ։ Մոտենանք կատարյալ Աստծուն․ «Եւ արդ, - ասում է ձեր Տէր Աստուածը, - դարձէք ինձ ձեր ամբողջ սրտով, ծոմապահութեամբ, լալով ու կոծելով: Ձեր սրտերը պատռեցէք եւ ոչ թէ ձեր հագուստները»:

Այո, դարձէք ձեր Տէր Աստծուն, որովհետեւ նա ողորմած է եւ գթասիրտ, համբերատար եւ բազումողորմ եւ ափսոսում է մարդկանց չարիքների համար» (Յովել 2:12 – 13):