Տ. Նավասարդ արքեպիսկոպոս Կճոյանը օրհնության գիր հանձնեց Նոյեմբերի 17-ին Արարատյան Հայրապետական թեմի առաջնորդական փոխանորդ գերաշնորհ Տ. Նավասարդ արքեպիսկոպոս Կճոյանը այցելեց Երևանի Ս. Հովհաննես եկեղեցի: Կիրակնօրյա Ս. Պատարագը մատուցվեց Տ. Նավասարդ Սրբազանի հանդիսապետությամբ: Պատարագիչը Ս. Հովհաննես եկեղեցու հոգևոր հովիվ արժանապատիվ Տեր Վահան քահանա Առաքելյանն էր: Սրբազան Հորն ուղեկցում էին առաջնորդանիստ Ս. Սարգիս եկեղեցու խորհրդակատար քահանա արժանապատիվ Տ. Պետրոս ավագ քահանա Մալյանը և ԱՀԹ երիտասարդաց խորհրդի և «Արարատ» երիտասարդաց միության անդամները: Ս. Պատարագի ավարտին Տ. Նավասարդ Սրբազանը օրհնության գիր հանձնեց եկեղեցու բարերաներից մեկին` Գուրգեն Վիրաբյանին, ում աջակցությամբ վերջերս ամբողջությամբ վերանորոգվել է Ս. Հովհաննես եկեղեցու տանիքը: Օրհնության գրում ասվում է. «Ս. Հովհաննես եկեղեցու հոգևոր դասի և բարեպաշտ հավատացելոց անունից հայտնում ենք նրանց երախտագիտությունը և շնորհակալությունը, ինչպես նաև բերում ենք Ձեզ մեր օրհնությունն ու գնահատանքը՝ Ձեր ազնիվ վերաբերմունքի և կատարած սիրահոժար աշխատանքի համար: Արտահայտելով Ձեր սերն Աստծո և նվիրումը Հայ Առաքելական Սուրբ Եկեղեցու հանդեպ՝ աստվածահաճո բարեգործությամբ հնարավոր դարձրիք Սբ. Հովհաննես եկեղեցու տանիքի ամբողջական վերանորոգումը: Մեր բյուր մաղթանքներն ու օրհնություններն ենք հղում Ձեզ՝ ցանկանալով արևշատ օրեր և աստվածաշնորհ խաղաղություն»:Ս. Պատարագի ավարտին Սրբազան հայրը մի քանի ժամ անցկացրեց Ս. Հովհաննես եկեղեցում, զրուցեց համայնքի հավատացյալների հետ, ծանոթացավ նրանց մտածումներին, անելիքներին: Տ. Նավասարդ Սրբազանը պարբերաբար այցելում է թեմի տարբեր եկեղեցիներ` ծանոթանալու եկեղեցաշինության, բարեկարգումների աշխատանքներին, զրուցում համայնքի անդամների հետ:

Արարատյան Հայրապետական թեմի մամլո դիվան