«Մի՛ վախեցեք, որովհետև ահա ձեզ մեծ ուրախություն եմ ավետում, որը ամբողջ ժողովրդինը կլինի. որովհետև այսօր դավթի քաղաքում ձեզ համար ծնվեց մի Փրկիչ, որ Օծյալ Տերն է» 
Ղուկաս 2. 10-11

Հոգեպարար ցնծություն, ուրախություն, բերկրանք ու նորոգություն…
Ժամանակի հոլովույթներին չենթարկվող, խորախորհուրդ այս զգացումներով է համակել մեզ նոր՝ 2015 թվականը, քանզի նորից ու նորովի լույս աշխարհ է եկել համայն մարդկության միակ Փրկիչը՝ Հիսուս Քրիստոս: 
Աստծո տիեզերածավալ սիրո բյուրեղ Բեթղեհեմի լույսը մշտապես բացեց նոր երկինքներ մեղքերի մեջ ունայնացած մարդու համար և դարձավ մարդ-վերածնունդի Մեսիան: 
 

Առատ մարդասիրությամբ և անհուն ողորմությամբ մեր Տերն Իր սերը ծառայությամբ նվիրաբերեց մեզ: Նա սիրեց ու ծառայեց…
 

Սիրելինե՛ր, 
 

Մեր աղոթանվեր մաղթանքներն ու օրհնություններն ենք հղում Ձեզ և Ձեր ընտանիքներին: 
 

Թո՛ղ յուրաքանչյուր ժամ, օր, տարի Սուրբ Ծնունդ լինի Քրիստոսասեր մեր կարոտյալ հոգիներում: 
 

Թո՛ղ Սերն ու նվիրումը, ծառայասիրությունն ու գթասրտությունը, հույսն ու բարձրաթռիչ հավատքը բարեզարդեն մեր կյանքը՝ պտղաբերելով Աստվածաստեղծ և Աստվածապատկեր քրիստոնյաներ: 
 

Թո՛ղ Երկնային Տիրոջ Բարեխնամ Աջը Բեթղեհեմյան հավերժական լույսի մեջ պանծացնի Էջմիածնասիրտ Հայաստան աշխարհը և հայ ժողովրդին: 
 

Քրիստոս ծնավ և հայտնեցավ
Օրհնյալ է Ծնունդը Քրիստոսի, 
Մեզ և Ձեզ Մեծ Ավետիս:

Նավասարդ արքեպիսկոպոս Կճոյան