Հունվարի 31-ին ս. Սարգիս զորավարի անունը կրող եկեղեցիներում կմատուցվի ս. պատարագ, որից հետո կկատարվի երիտասարդների օրհնության կարգ: Արարատյան Հայրապետական թեմում գործում են երեք ս.Սարգիս անունը կրող եկեղեցիներ՝ առաջնորդանիստ, Նոր Նորքի և Արգավանդի: 

Ս. պատարագից առաջ Ն.Ս. Օ. Տ. Տ. Գարեգին Բ Ամենայն Հայոց Հայրապետի արտոնմամբ Մայր Աթոռ Սուրբ Էջմիածնից ԱՀԹ առաջնորդանիստ ս. Սարգիս եկեղեցի կբերվի ս. Սարգիս զորավարի մասունքակիր աջը:
Նույն օրը Մ. Մաշտոցի անվան Մատենադարանից առաջնորդանիստ ս. Սարգիս կբերվի 17-րդ դարում Ավետիս երեցի կողմից ս. Սարգիս եկեղեցում ընդօրինակված Ավետարանը:

Ավետարանն ու սրբի աջը եկեղեցում կմնան մինչև 17.30-ը:

Հունվարի 31-ին ԱՀԹ առաջնորդական փոխանորդ գերաշնորհ Տ. Նավասարդ արքեպիսկոպոս Կճոյանի օրհնությամբ թեմի Առաջնորդանիստ, Նոր Նորքի և Արգավանդի ս. Սարգիս եկեղեցիները բաց կլինեն մինչև ժ. 22.00-ն:

Խաչերթ

Հունվարի 31-ին՝ 14.00-ին, առաջնորդանիստ ս. Սարգիս եկեղեցուց կմեկնարկի խաչերթ: Մասնակիցները Մ. Մաշտոց և Մ. Բաղրամյան պողոտաներով կուղևորվեն դեպի Պողոսյան այգիներ՝ Սիրահարների պուրակ: Խաչերթին մասնակցելու են թեմի քահանաները, երիտասարդներ, ուսանողներ, ռազմական ու ոստիկանական ակադեմիայի սաներ: Խաչերթին կարող են միանալ բոլորը:

Տոնական համերգ

Հունվարի 31-ին՝ ժ. 15.00-ին, ս. Սարգսի տոնին Արարատյան Հայրապետական թեմը «Պողոսյան» պարտեզներում կազմակերպում է մեծ տոնախմբություն: Համերգային ծրագրի ընթացքում այգու տարածքում կշրջի նվերաբաշխ ձիավորը: Մուտքն ազատ է:

Բանակային միջոցառումներ

Ծրագրում՝ հոգևորականի օրհնության խոսք, թատերական ներկայացում, համերգ, խաղեր, հարց ու պատասխան, մրցանակներ:
Հունվարի 29-ին՝ ժ. 12.00-ին, 5-րդ կայազորի Նուբարաշենի զինավանի 1-ին և 2-րդ գնդեր:
Հունվարի 29-ին՝ ժ. 15.00-ին, 5-րդ կայազորի Նուբարաշենի զինավանի 3-րդ գունդ:
Հունվարի 30-ին՝ ժ. 15.00-ին, Խամփերյանցի անվան ռազմաօդային ինստիտուտ:

Միջոցառումներ ռազմական կրթօջախներում և հոսպիտալում

Ծրագրում՝ հոգևորականի խոսք, Հովհ. Թումանյանի անվ. թանգարանի «Ռոտոնդա» թատերախմբի ներկայացումներ՝ նվիրված ս. Սարգսին, վիկտորինա, մրցանակներ:
Հունվարի 29-ին՝ ժ. 13.00-ին, Մովսես Գորգիսյանի անվան թիվ 158 հիմնական դպրոց:
Հունվարի 30-ին՝ ժ. 13.00-ին, Լևոն Միրիջանյանի անվան թիվ 155 ավագ դպրոց:
Հունվարի 30-ին՝ ժ. 15.00-ին, Երևանի կայազորի զինվորական հոսպիտալ:
Հունվարի 30-ին՝ ժ. 17.00-ին, Միջոցառում «Հալեպ» հայրենակցական բարեսիրական և Համաշխարհային հայկական երիտասարդական «Ոստայն» հասարակական կազմակերպությունների համար: Ծրագրում՝ հոգևորականի խոսք, Հովհ. Թումանյանի անվ. թանգարանի «Ռոտոնդա» թատերախմբի ներկայացումներ՝ նվիրված ս. Սարգսին, վիկտորինա, մրցանակներ:

Համերգային ծրագրեր

Հունվարի 30-ին՝ ժ. 18.00-ին, բացօթյա մեծ միջոցառում Կարապի լճի տարածքում: Ծրագրում` տոնը խորհրդանշող ձիավոր, սիրո յուրահատուկ խոստովանությունների մրցույթ, աղաբլիթներ, բացիկներ, փուչիկներ բոլոր ներկաների համար: Մուտքն ազատ է:
Կազմակերպիչ` Հ3 հեռուստաընկերություն, աջակից` Արարատյան Հայրապետական թեմ, Երևանի քաղաքապետարան, «Ժպիտ» ակումբ:

Ցուցահանդեսներ

Հունվարի 30-ին` ժ. 14.00-ին, կբացվի Արարատյան Հայրապետական թեմի և Գեղագիտության Ազգային կենտրոնի կողմից կազմակերպված մանկապատանեկան տոնական ցուցահանդես՝ նվիրված ս. Սարգսի տոնին:
Ցուցահանդես-մրցույթներ են կազմակերպվում ստեղծագործական բուհերում ու դպրոցում՝ Խ. Աբովյանի անվան Հայկական պետական մանկավարժական համալսարանում, Երևանի Գեղարվեստի պետական ակադեմիայում, Ճարտարապետության և շինարարության Հայաստանի ազգային համալսարանում և Հ. Կոջոյանի անվան գեղարվեստի դպրոցում: Յուրաքանչյուր ուսումնական հաստատությունում ցուցահանդես-մրցույթ կկազամկերպի:
Փետրվարի 15-ին՝ ժամը 13.30-ին, Կասկադ համալիրում կլինի մեծ ցուցահանդես-վաճառք «Ս. Սարգսի տոնից Տեառնընդառաջ և Բարեկենդան» խորագրով: