Մարտի 22-ին ԱՀԹ Զորավոր ս. Աստվածածին եկեղեցու «Զորավոր» երիտասարդաց միությունը Ծաղկազարդի տոնին ընդառաջ եկեղեցու հոգևոր հովիվ Տ. Գրիգոր քահանա Գրիգորյանի և երիտասարդաց միության հոգևոր պատասխանատու Տ. Զգոն քահանա Աբրահամյանի հետ այցելեց Մարի Իզմիրլյանի անվան մանկատուն:
Տ. Գրիգորը մանկատան տնօրինությանը, մանկավարժներին և երեխաներին փոխանցեց առաջնորդական փոխանորդ գերաշնորհ Տ. Նավասարդ արքեպիսկոպոսի օրհնությունն ու գնահատանքը:
Հյուրերն անակնկալ մատուցեցին երեխաներին՝ իրենց հետ տանելով հեքիաթի հերոսների: Միանալով հերոսներին` երեխաները պարեցին, մասնակցեցին խաղերի: Երիտասարդները նաև միրգ, քաղցրավենիք և հիգիենիկ պարագաներ էին տարել մանկատան սաների համար:
Տեր հայրերը բժշկության ավետարան կարդացին միջոցառմանը մասնակցել չկարողացող փոքրիկների համար: Վերջում Տ. Գրիգորը Պահպանիչ աղոթք կարդաց:
Արարատյան Հայրապետական թեմի տեղեկատվական բաժին
