Երեխաների պաշտպանության օրը Աստծո պաշտպանության ներքո
Մայիսի 31-ին Զորավոր ս. Աստվածածին եկեղեցին երեխաների պաշտպանության միջազգային օրվան ընդառաջ երեխաների համար տոն էր կազմակերպել: Հավարտ ս. պատարագի երեխաների համար կատարվեց օրհնության կարգ, ապա եկեղեցու հոգևոր հովիվ Տ. Գրիգոր քահանա Գրիգորյանը երեխաներին փոխանցեց ԱՀԹ առաջնորդական փոխանորդ գերաշնորհ Տ. Նավասարդ արքեպիսկոպոսի օրհնությունն ու շնորհավորանքը երեխաների պաշտպանության միջազգային օրվա առթիվ: «Ձեր ներկայությունը եկեղեցում շատ ուրախալի է և խրախուսելի: Մեզ համար շատ կարևոր է ձեր աստվածահաճո դաստիարակությունը, որովհետև միայն աստվածային պատվիրաններին հավատարիմ մնալով և ազգային արժեքները պահպանելով պետք է արժանի զավակը լինեք մեր երկրի և մեր Սուրբ Եկեղեցու»,- ասաց Տեր Գրիգորը:
Եկեղեցու բակում բոլորի ուշադրության կենտրոնում երեխաներն էին: Նախ երեխաները բաժանվեցին կարմիր, կապույտ, նարնջագույն թիմերի, բացատրեցին գույների խորհուրդները, ապա սկսվեցին թիմային խաղերը: Կավճանկարից հետո երեխաները, սեղանների շուրջ հավաքված, իրենց մաքուր ու անկեղծ աշխարհի գունագեղ պատկերներն էին հանձնում թղթին, գունավորում էին հեքիաթների և մուլտֆիլմների իրենց սիրելի կերպարներին, փայտից տարբեր առարկաներ էին պատրաստում: Ապա խմբերից մեկը երգում էր, մյուսները փորձում էին գդալներով երգի երաժշտությունը ստանալ: Այնուհետև հաջորդեցին գնդակներով անցակցվող խաղերը: Հաղթեց «Կարմիր» թիմը, մրցանակներ ստացան թե՛ հաղթող և թե՛ մյուս թիմերը: Ապա երեխաների խաղին նոր խաղերով, երգով, պարով և հանելուկներով միացան «Երազանք» թատերախմբի «Մաշան և արջը» մուլտֆիլմի կերպարներից Մաշան և խաղավարը:
Խաղերից հետո երեխաները համտեսեցին տոնական տորթը, որ օրվա խորհրդանիշ դրոշի աճ, ներդաշնակություն, թարմություն, պտղաբերություն խորհրդանշող կանաչ գույնով էր պատված:
Խաղերին մեծ ոգևորությամբ մասնկացում էին նաև սիրիահայ երեխաները: Արդեն երեք տարի է՝ սիրահայերը ներգրավված են Զորավոր ս. Աստվածածին եկեղեցու արարողություններին և համայնքային կյանքին:
Կարինե Սուգիկյան
- 2015-05-31