Այս տարի օգոստոսի 16-ին Հայ Առաքելական Սուրբ Եկեղեցին նշեց Տիրամոր վերափոխման տոնը: Տոնի առթիվ Արարատյան Հայրապետական թեմի բոլոր եկեղեցիներում մատուցվեց Ս. Պատարագ և կատարվեց խաղողի օրհնության կարգ: Հավարտ Ս. Պատարագի թեմի մի շարք համայնքներում առաջնորդական փոխանորդ գերաշնորհ Տ. Նավասարդ արքեպիսկոպոս Կճոյանի օրհնությամբ իրականացվեցին տոնական միջոցառումներ, մատուցվեց մատաղ ու կազմակերպվեց սիրո ճաշ:

Արտաշատի Ս. Հովհաննես Ավետարանիչ եկեղեցու բակում  հոգևոր հովիվ Տ. Թաթուլ քահանա Գասպարյանն Արտաշատի բոլոր մանկապարտեզների ավարտական խմբերի սաների օրհնության կարգ կատարեց: Տեր հայրն օրհնեց նաև փոքրիկների բերած խաղող ու պտուղներ, որոնք բաժանվեցին ներկաներին: Արարողությունից հետո տոնական մեծ միջոցառում էր կազմակերպվել եկեղեցու երգչախմբի և երիտասարդաց միության մասնակցությամբ: Միջոցառմանը ելույթ ունեցան նաև Արտաշատի «Արարատ» ժողգործիքների համույթը, Արտաշատի «Միլեն», Մասիսի «Տավրոս» և Մխչյանի պարային համույթները, ինչպես նաև երգիչներ Հարություն Հովհաննիսյանն ու Վալերի Այվազյանը:
 

Նոր Նորքի Ս. Աստվածածին եկեղեցում  վարչական շրջանում ևս կատարվեց խաղողի օրհնության կարգ, որին մասնակցում էին նաև մանկապարտեզների սաներ: Համայնքի ջանքերով բակում  ազգային ուտեստների հյուրասիրություն էր կազմակերպվել, իսկ երեխաների համար ստեղծվել էր  կավճով նկարելու հնարավորություն:
 

Երևանի Ս. Հովհաննես եկեղեցու բակում Ս. Պատարագից ու խաղողօրհնեքից հետո եկեղեցու երիտասարդաց միության անդամները եկեղեցու բակում կազմակերպել էին տոնական համերգ, որին մասնակցում էին Կիրակնօրյա դպրոցի սաները , «Մենք» պարային և «Սասուն» ազգագրական երգի-պարի համույթները:
 

Նորաբացի Ս. Աստվածածին եկեղեցու բակում  համայնքի երեխաները ելույթ ունեցան աշխույժ երգուպարով ու ասմունքով, որից հետո եկեղեցու բարերար Գալուստ Գալստյանի աջակցությամբ տոնական միջոցառումն էլ ավելի տոնական դարձրեց լարախաղացը: Միջոցառման ավարտին ներկաներին պաղպաղակ հյուրասիրվեց:
 

Ս. Երրորդություն եկեղեցու բակում  կազմակերպված սիրո ճաշից հետո եկղեցու հոգևոր հովիվ Տ. Զգոն քահանա Բարսեղյանի նախաձեռնությամբ Աշուղ Նազելի  և «Ջիվանու» անվան աշուղական դպրոցի սաների մասնակցությամբ տոնական համերգ տեղի ունեցավ, ինչը բարձր տրամադրություն հաղորդեց ներկաներին:

Զորավոր Ս. Աստվածածին եկեղեցու բակը զարդարվել էր տոնին համահունչ: Ս. Պատարագից հետո բակում կոմիտասյան և ժողովրդական երգերի կատարումներով հանդես եկավ եկեղեցու «Զորավոր» երգչախումբը: Ապա հանդիսատեսին ներկայացրեցին Կիրակնօրյա դպրոցի սաները, որոնց միացել էին նաև «Զորավոր» երիտասարդաց միության անդամները: Նրանք հանդիսատեսին ներկայացրին տոնի պատմությունը, խորհրուրդն ու ժողովրդական սովորությունները:
 

Ավանի Ս. Աստվածածին եկեղեցու բակում Ավան վարչական շրջանի աջակցությամբ, ինչպես ամեն տարի, այս անգամ ևս Ս. Պատարագի ավարտին տեղի ունեցավ հյուրասիրություն և տոնական մեծ միջոցառում, որի ընթացքում ելույթ ունեցավ «Վերադարձ» ազգագրական երգի-պարի խումբը: Հաջորդ օրը՝ օգոստոսի 17-ին, Ավանի Սուրբ Աստվածածին եկեղեցու հոգևոր հովիվ Տեր Հարություն քահանա Ավագյանն այցելեց «Առաքելություն Հայաստան» ՀԿ-ի «Ցերեկային կենտրոն» և կատարեց խաղողօրհնեքի կարգ: Այնուհետև Տեր հայրը ներկաներին պատմեց Ս. Աստվածածնի տոնի և խաղողօրհեքի խորհրդի մասին:
 

Նուբարաշենի Ս. Նահատակաց եկեղեցու բակում  կազմակերպված տոնական միջոցառմանը մասնակցում էին Նուբարաշենի մշակույթի տան սաները:
 

Արգավանդի Ս. Սարգիս եկեղեցու բակում  Ս. Պատարագի ավարտին մատուցված սիրո ճաշից հետո եկեղեցու երիտասարդաց միության, կիրակնօրյա դպրոցի և Մարի Իզմիրլյանի անվան մանկատան սաների մասնակցությամբ տոնական միջոցառում տեղի ունեցավ:
 

Մասիսի Ս. Գևորգ եկեղեցու բակում մատուցվեց սիրո ճաշ և եկեղեցու երիտասարդաց միության անդամները հանդես եկան միջոցառմամբ, որի ընթացքում ներկայացրին տոնի խորհուրդը:
 

Շահումյանի Ս. Աստվածածին եկեղեցու բակում  ևս  սիրո ճաշ հյուրասիրվեց, ապա բակում ելույթ ունեցավ Այգեպատ համայնքի ժողավրդական երգի-պարի խումբը: Վեդու Ս. Աստվածածին եկեղեցու բակում  ներկաների համար տոնախմբության վերածեցին Ոսկետապ համայնքի «Վասպուրական» պարի խմբի և Վեդու մշակույթի տան սաների ելույթները:  Արևշատի Ս. Աստվածածին եկեղեցու բակում  ելույթ ունեցան  համայնքի երեխաներն ու «Լոտոս» պարի խումբը:
 

Կաթողիկե Ս. Աստվածածին եկեղեցու բակում Երևանի Կենտրոն վարչական շրջանի մշակութային բաժնի նախաձեռնությամբ եկեղեցու բակում ավանդական սովորություներով համեմված տոնախմբություն էր կազմակերպվել, որին մասնակցում էին «Կարին», «Տավիղ» ազգագրական երգի- պարի համույթները և եկեղեցու երիտասարդաց միությունը:

Արարատյան Հայրապետական թեմի տեղեկատվական բաժին