Հոկտեմբերի 7-ին ԱՀԹ առաջնորդական փոխանորդ գերաշնորհ Տ. Նավասարդ արքեպիսկոպոս Կճոյանը Կոմիտասի թանգարանում մասնակցեց «Կոմիտաս» պատկերագրքի շնորհանդեսին: Գիրքը հրատարակվել է Տ. Նավասարդ Սրբազանի օրհնությամբ: Միջոցառմանը մասնակցում էին ԱԺ փոխնախագահ Հերմինե Նաղդալյանը,Երևանի քաղաքապետ Տարոն Մարգարյանը, Սփյուռքի նախարար Հրանուշ Հակոբյանը, գիտնականներ, մշակութաբաններ: Երեկոյի ընթացքում ելույթ ունեցան Արարատյան Հայրապետական թեմի «Ծաղկազարդ» համախումբը՝ Լիլիթ Գրիգորյանի ղեկավարությամբ, ՀՀ ժողովրդական արտիստ, միջազգային մրցույթների դափնեկիր Սվետլաննա Նավասարդյանը:
Գրքի մասին դրվատանքի խոսքերով հանդես եկավ կոմիտասագետ Արթուր Շահնազարյանը: Մեծածավալ պատկերագրքում հրապարակվել են Կոմիտասին նվիրված ստեղծագործությունների՝ գեղանկարների ու քանդակների լուսանկարներն ու Կոմիտասի նամակները: Մի մեծ բաժին տրամադրված է Կոմիտասի մասին գրված հրապարակումների ու հոդվածների մատենագրությանը: Գիրքը հրատարակվել է Համաշխարհային հայ նկարիչների միության նախաձեռնությամբ, Երևանի քաղաքապետարանի աջակցությամբ և Ս. Աստվածամայր ԲԿ-ի տնօրեն Նիկոլայ Դալլաքյանի մեկենասությամբ:
Արարատյան Հայրապետական թեմի տեղեկատվական բաժին