Դեկտեմբերի 12-ին Հայ Առաքելական Սուրբ եկեղեցին նշեց Ս. Հակոբ Մծբնա Հայրապետի տոնը:
ԱՀԹ առաջնորդական փոխանորդ գերաշնորհ Տ. Նավասարդ արքեպիսկոպոս Կճոյանի օրհնությամբ տոնի առթիվ Արարատյան Հայրապետական թեմի` Արարատի, Մրգավանի և Քանաքեռի` սրբի անունը կրող երեք եկեղեցիներում մատուցվեց Ս. Պատարագ, որի ավարտին կազմակերպվեցին մատաղի հյուրասիրություն և տոնական միջոցառումներ:
Ն.Ս.Օ.Տ.Տ. Գարեգին Բ Ամենայն Հայոց Հայրապետի օրհնությամբ Մայր Աթոռ Սուրբ Էջմիածնից թեմի առաջնորդանիստ Ս. Սարգիս եկեղեցու հոգևոր հովիվ Տ. Պետրոս ավագ քահանա Մալյանի գլխավորությամբ Մրգավանի Ս. Հակոբ եկեղեցի բերվեց Ս. Հակոբ Մծբնա Հայրապետի շնորհաբաշխ աջը: ԱՀԹ երիտասարդները և ուխտավորները թափոր կազմած դիմավորեցին սրբի աջը: Տոնական Ս. Պատարագը մատուցեց եկեղեցու հոգևոր հովիվ Տ. Դավիթ քահանա Կյուրեղյանը: Ս. Պատարագի երգեցողությանը մասնակցեց նաև «Արարատ» երգչախումբը: Տոնի առթիվ ներկա էին նաև բազմաթիվ ուխտավորներ՝ թեմի եկեղեցիների հոգևոր հովիվների գլխավորությամբ:
Հավարտ Ս. Պատարագի եկեղեցու բակում կազմակերպվել էր մատաղի հյուրասիրություն և տոնական միջոցառում՝ Մրգավանի «Շավիղ» պարի խմբի մասնակցությամբ:
ԱՀԹ Արարատի Ս. Հակոբ եկեղեցում Ս. Պատարագը մատուցեց Մայր Աթոռ Սուրբ Էջմիածնի միաբան Տ. Երեմիա աբեղա Աբգարյանը: Այստեղ էլ ուխտավորների պակաս չկար, ովքեր եկել էին Երևանի և Արարատի մարզի տարբեր եկեղեցիների համայնքներից: Հավարտ Ս. Պատարագի կազմակերպվել էր մատաղի հյուրասիրություն, որին հաջորդեց համերգային ծրագիր՝ համայնքի երեխաների մասնակցությամբ:
Քանաքեռի Ս. Հակոբ եկեղեցում նույնպես ուխտի օր էր: Ս. Պատարագը մատուցեց եկեղեցու հոգևոր հովիվ Տ. Սերովբե ավագ քահանա Պետրոսյանը: ԱՀԹ երիտասարդները ներկաներին տոնի խորհուրդը ներկայացնող թերթոններ բաժանեցին, որոնք պատրաստել էին առաջնորդանիստ Ս. Սարգիս եկեղեցու «Արարատ» երիտասարդաց միության անդամները: Հավարտ Ս. Պատարագի հավատացյալներին մատաղ հյուրասիրվեց: Թեմի երիտասարդները Տ. Սերովբեի գլխավորությամբ այցելեցին Մայր Աթոռ Սուրբ Էջմիածնի և Հայկական բարեգործական ընդհանուր միության (ՀԲԸՄ) Մանրանկարչության արվեստի դպրոց, ծանոթացան սաների հետ, դիտեցին նրանց աշխատանքները: Դպրոցում տոնական հյուրասիրություն էր կազմակերպվել հյուրերի համար:
Արարատյան Հայրապետական թեմի տեղեկատվական բաժին