Ս. Ծննդյան նվերներ ու բարեմաղթանքներ հայոց բանակի զինվորներին
Դեկտեմբերի 26-ին ԱՀԹ առաջնորդական փոխանորդ գերաշնորհ Տ. Նավասարդ արքեպիսկոպոս Կճոյանի օրհնությամբ Արտաշատի Ս. Հովհաննես Ավետարանիչ եկեղեցու երիտասարդաց միությունը Տ. Երվանդ քահանա Բաբայանի գլխավորությամբ այցելեց Արարատի N զորամաս: Այցի նպատակը զինվորների Ամանորն ու Սուրբ Ծնունդը շնորհավորելն էր:
Նրանք ծանոթացան զինվորների առօրյային, ճաշեցին նրանց հետ: Տեր հայրը զինվորներին և հրամանատարական կազմին փոխանցեց Տ. Նավասարդ Սրբազանի օրհնությունն ու Ամանորյա ու Ս. Ծննդյան շնորհավորանքները: Զինվորների հետ հոգևոր զրույցի ընթացքում Տեր հայրը պատասխանեց հուզող հարցերին:
Երիտասարդները զինվորների համար պատրաստել էին մեծ քանակությամբ մրգերի, քաղցրավենիքի, հյութի և գուլպաների փաթեթներ:
Նախաձեռնությանը աջակցել են Արտաշատի «Հայռուսգազարդ»-ի գրասենյակը, Արտաշատի «Արարատ» ջրերի գործարանը, եկեղեցու համայնքն ու երիտասարդաց միությունը:
Արարատյան Հայրապետական թեմի տեղեկատվական բաժին
- 2015-12-26