Նորակոչիկները սրբապատկերներ և խաչեր ստացան Մասիսի ուխտավորներից
Օգոստոսի 4-ին և 5-ին Արարատյան Հայրապետական թեմի առաջնորդական փոխանորդ Գերաշնորհ Տ. Նավասարդ արքեպիսկոպոս Կճոյանի օրհնությամբ և Մասիսի Ս. Գևորգ եկեղեցու հոգևոր հովիվ Տեր Աշոտ քահանա Սաֆարյանի նախաձեռնությամբ համայնքի անդամներն ուխտագնացության մեկնեցին Արցախի սրբավայրեր։
Ուխտագնացության ընթացքում Գանձասարի Ս. Հովհաննես եկեղեցում հավատացյալները հանդիպեցին 500-ից ավելի նորակոչիկների։
Նորակոչիկների այդչափ մեծ քանակը եկեղեցում կապված է հետաքրքիր մի սովորության հետ։ Արցախում ավանդույթ է դարձել՝ մեկ ամիս ծառայած նորակոչիկները մինչ բուն ծառայության անցնելը այցելում են եկեղեցի և օրհնություն ստանում։ Այս անգամ Գանձասարում նորակոչիկները հանդիպեցին մասիսցի ուխտավորներին։
- Եղբայրս՝ Դավիթ սարկավագ Սաֆարյանը, նոր է վերադարձել Երուսաղեմից։ Նա իր հետ 1000 հատ խաչ էր բերել՝ ուխտելով դրանք նվիրել հավատացյալներին։ Գանձասարում նորակոչիկներին հանդիպելը հիանալի առիթ դարձավ ուխտը կատարելու համար, - ասաց Մասիսի Ս. Գևորգ եկեղեցու հոգևոր հովիվ Տեր Աշոտ քահանա Սաֆարյանը։
Տեր հայրն օրհնեց բոլոր զինվորներին և խաչեր ու սրբապատկերներ բաժանեց՝ մաղթելով խաղաղ ծառայություն ու Աստծո օրհնությունը խնդրելով նրանց համար։
Թող Աստված օրհնի, ուժ և զորություն պարգևի Հայաստանի Հանրապետության Զինված ուժերի բոլոր մարտիկներին:
Արարատյան Հայրապետական թեմի տեղեկատվական բաժին
- 2016-08-07