Խաչի գյուտի տոնը Զորավոր Ս․ Աստվածածին եկեղեցում
Արարատյան Հայրապետական թեմի առաջնորդական փոխանորդ Գերաշնորհ Տ. Նավասարդ արք. Կճոյանի օրհնությամբ՝ Գյուտ Խաչի տոնն այս տարի առաջին անգամ հայտարարվել էր Զորավոր Ս. Աստվածածին եկեղեցու ուխտի օր՝ ի պատիվ այնտեղ պահվող մասնատուփ-պահարանի, որի կենտրոնական հատվածում զետեղված է Տիրոջ Խաչափայտի մասունքը, իսկ խաչի թևերում չորս սրբերի՝ Սուրբ Բարսեղ Մեծի, Սուրբ Մակարիոսի և անհայտ երկու սրբերի մասունքներ:
Ուխտավորները Զորավոր Ս. Աստվածածին եկեղեցում մասնակից եղան Առավոտյան ժամերգությանը, ապա՝ ուխտի Ս. Պատարագին, որ մատուցեց եկեղեցու հոգևոր հովիվ Տեր Գրիգոր քահանա Գրիգորյանը: Պատարագի ավարտից հետո համայնքի անդամներն ու ուխտավորները հաղորդակից եղան Զորավոր մասնատուփ-պահարանի օրհնությանը՝ հայցելով Տիրոջից մասնատուփ-պահարանում պահվող սրբերի բարեխոսությունը և Սուրբ Խաչի զորությունը:
Եկեղեցու հայրերի վկայությամբ՝ այն եկեղեցիներում, ուր պահվում են սրբերի մասունքներ, տվյալ սրբերը ոչ միայն ներկա են արարողություններին, այլ նաև բարեխոս են Տիրոջ առջև ներկաների համար: Մեր փրկիչը՝ Հիսուս Քրիստոս, պարգևել է մեզ փրկարար աղբյուրներ՝ սրբերի մասունքները, որոնց օրհնությանն արժանանում են նրանք, ովքեր հավատքով հաղորդակից են լինում նրանց: Ինչպես Ս. Հովհան Ոսկեբերանն ասել՝ «Աստված սրբերի մասունքները պարգևում է մեզ՝ որպես հուսալի ապաստարան և պաշտպանություն ընդդեմ չարի: Ուստի հորդորում եմ բոլորիդ, եթե տխրության մեջ է ինչ-որ մեկը, հիվանդ է կամ դժվարությունների մեջ, կամ ընկել է մեղքերի խորխորատը, ապա շտապեք հավատքով դեպի սուրբ մասունքները, մեծ օգնություն կստանանք և կվերադառնաք այնտեղից մեծ ուրախությամբ»:
Կարինե Սուգիկյանa
- 2018-10-29