Յուրաքանչյուր տոն մեծ տարածում և հնչեղություն է ձեռք բերում նաև այն դեպքում, երբ նրա շուրջ հավաքվում է մեծ թիմ:  Փետրվարի 16-ին Արարատյան Հայրապետական թեմը նշեց Սուրբ Սարգսի տոնը, և ինչպես նախորդ տարիներին, այս տարի ևս տոնին միացան մի շարք կազմակերպություններ:
 

Ս. Սարգսի տոնի կազմակերպման հարցում զգալի էր Երևանի քաղաքապետարանի աջակցությունը, քանի որ Երևանի վարչական շրջաններում տոնի հետ կապված կազմակերպվեցին  բազմաթիվ ծրագրեր ու համերգներ:
 

Արդեն 3-րդ անգամ Արարատյան Հայրապետական թեմը և «Բուկինիստ» գրախանութների ցանցը համատեղ իրականացրեցին «Իմ գաղտնի գրքաՍեր  կամ սիրո խոստովանություն գրքով» ծրագիրը:
 

Տոնին միացել էին նաև Սունդուկյանի անվան ազգային ակադեմիական թատրոնն ու Համազգային թատրոնը, ովքեր տրամադրել էին ներկայացումների տոմսեր: Գուրմե-Դուրմեն տոնին միացել էր իր համեղ շոկոլադներով, իսկ  «Մոսկվա» կինոթատրոնը ու Կինոպարկը՝ ֆիլմերի տոմսերով:
 

Լոֆթում այցելուները դարձան ազգային տոնի ու երիտասարդական նախաձեռնությունների մասնակից: Այստեղ աղի բլիթների ու փոխինձի հյուրասիրություն տեղի ունեցավ:
 

Երևանի առևտրային 2 մեծ կենտրոններ՝  Երևան մոլը  և Ռիո մոլը, Ս.Սարգսի տոնի կապակցությամբ նախաձեռնել էին մի շարք ակցիաներ մեր համաքաղաքացիների համար:
 

Անմասն չմնացին բջջային 2 օպերատորներ՝ Վիվասել ՄՏՍ-ը և UCOM-ը: Ամեն տարի սեփական նախաձեռնությամբ Վիվասել ՄՏՍ-ը տարբեր ակցիաներ է հայտարարում իր հաճախորդների համար, իսկ UCOM-ը՝ կարճ հաղորդագրությունների միջոցով շնորհավորում իր բաժանորդներին:
 

Շնորհակալություն ենք հայտնում մեր բոլոր գործընկերներին և լիահույս ենք, որ համագործակցությունը կլինի շարունակական, և այս գեղեցիկ տոնը տարեցտարի իր շուրջը կհամախմբի նոր գործընկերների:

Արարատյան Հայրապետական թեմի տեղեկատվական բաժին