Փետրվարի 7-ին Արաբկիր վարչական շրջանի նորակառույց եկեղեցում Մայր Աթոռ Սուրբ Էջմիածնի միաբաններ Գերաշնորհ Տ. Մուշեղ եպիսկոպոս Բաբայանի և Գերաշնորհ Տ․ Հովնան եպիսկոպոս Հակոբյանի ձեռամբ կատարվեց եկեղեցու Մկրտության սուրբ ավազանի և վեմ քարերի օծման արարողությունը։

Համաձայն Հայաստանյայց Առաքելական Սուրբ Եկեղեցու կանոնակարգված արարողության՝  ավազանը և վեմ քարերը լվացվեցին նախ ջրով և գինով, ապա Սրբազան Հոր ձեռամբ օծվեցին Սրբալույս Մյուռոնով:

Գերաշնորհ Տ. Մուշեղ եպիսկոպոս Բաբայանն իր շնորհավորական խոսքն ուղղեց ներկաներին՝ մաղթելով, որ նորաօծ ավազանը բազում հավատացյալների համար դառնա իրենց քրիստոնեական ուղու սկիզբը։ 

Արարողության ավարտին ներկա հավատացյալ ժողովուրդը հնարավորություն ունեցավ մոտենալ և համբուրել օծված վեմ քարերը, որից հետո բոլորը մասնակցեցին եկեղեցու բակում կազմակերպված՝ Բուն Բարեկենդանին նվիրված տոնական միջոցառմանը։

Նշենք, որ փետրվարի 11-ին՝ ժամը 11.00-ին, նորակառույց եկեղեցում կմատուցվի անդրանիկ Ս․ Պատարագը՝  նվիրված Բուն Բարեկենդանի տոնին:

Հասմիկ Թամամյան