ԱՀԹ առաջնորդական փոխանորդ Գերաշնորհ Տ.Նավասարդ արքեպիսկոպոս Կճոյանի օրհնությամբ Արգավանդի Ս. Սարգիս եկեղեցու համայնքն արդեն յոթ տարի անընդմեջ Սևանա լճի ափին կազակերպում է  ճամբար հաշմանդամություն ունեցող  երեխաների, կիրակնօրյա դպրոցի սաների, համայնքի անապահով ու բազմազավակ ընտանիքների մանուկների համար:
 

Ծրագրի նախնական շրջանում ճամբարին մասնակցում էին միայն Մ. Իզմիրլյանի անվան մանկատան երեխաները, սակայն ճամբարի մասնակիցների թիվն այսօր համալրվել է նաև այլ՝ առողջ երեխաներով: Ծնողները կարևորեցին այս քայլը նշելով, որ իրենց երեխաները տասն օր շարունակ ապրում են կարիքավոր երեխաների հետ  և զուգահեռաբար սովորում են հավասարություն, կարեկցանք, ընկերություն:
 

Ճամբարում երեխաները, հանգստին ու խաղերին զուգահեռ, մասնակցում են  նաև հոգևոր թեմաներով զրույցների: Ծնողները նշում են, որ ճամբարից հետո փոփոխություն են զգում երեխաների մեջ: Իսկ շատ ծնողներ էլ կամավորագրվում են ճամբարում երեխաներին հոգ տանելու համար:
 

Այս տարի ճամբարը կգործի հուլիսի 22-ից օգոստոսի 1-ը: Երեցկին Անահիտ Հովհաննիսյանը, ով ղեկավարում է ճամբարի ընթացքը, նշում է, որ սա մեծ փորձառություն և  դաս է  նախ իր, ապա՝ երիտասարդ քրիստոնյաների համար:
 

Ծրագրի նպատակը, սոսկ հանգիստ կազմակերպելը չէ, այլ՝ սիրո, ընկերության, ի վերջո ընտանեական մթնոլորտ ստեղծելը: Մեկ ճամբար՝ մեկ ընտանիք:

Զարա Ղազարյան