Սեպտեմբերի 28-ին Հայ Առաքելական Սուրբ Եկեղեցին նշում է Ս. Գևորգ զորավարի տոնը: Արարատյան Հայրապետական թեմի առաջնորդական փոխանորդ Գերաշնորհ Տ. Նավասարդ արքեպիսկոպոս Կճոյանի օրհնությամբ` տոնը մեծ տոնախմբություններով նշվում է Ս. Գևորգի անունը կրող՝ Արարատյան Հայրապետական թեմի չորս եկեղեցիներում, որոնցից մեկն է Արարատի մարզի Կանաչուտ գյուղի եկեղեցին:
Այս տարի տոնը Կանաչուտում ևս մեծ շուքով նշվեց: Մատուցվեց Ս. Պատարագ հոգևոր հովիվ Տ. Դավիթ քահանա Կյուրեղյանի ձեռամբ:
Տեր հայրը հավաքվածներին դիմեց իր օրհնության խոսքով: Նա իր խոսքում հիշեց Ս. Գևորգի կյանքը, հալածանքները, որոնց նա ենթարկվել է իր քրիստոնեական հավատը խոստովանելու համար:
Համայնքի բնակիչներին Ս. Գևորգ զորավարի տոնը նշելու համար միացել էին այլ համայնքներից Կանաչուտ եկած ուխտավորների խմբեր:
Ս. Պատարագից հետո եկեղեցու բակում տեղի ունեցավ միջոցառում, որին մասնակցում էին Կանաչուտ համայնքի պարի խումբը և դպրոցի աշակերտնրը: Ներկաներին մատուցվեց մատաղ:
Արարատյան Հայրապետական թեմի տեղեկատվական բաժին
