Այս օրերին մարդկությունը միասնաբար պայքարում է անտեսանելի թշնամու՝ համաճարակի դեմ, որը սփռվել է ողջ աշխարհով։ Եվ այդ պայքարի առաջնագծում են մեր բուժաշխատողները, ովքեր անձնուրաց կերպով փորձում են նվազեցնել չարիքի հետևանքները։ Հոգևոր դասը ևս մեր բժիշկների և հիվանդների կողքին է։
Արարատյան Հայրապետական թեմի հոգևորականներն այս օրերին հովվական այցելություններ են կատարում իրենց համայնքներում գործող բուժհաստատություններ` աղոթք բարձրացնելով առ Աստված, խնդրելով ապաքինում հիվանդներին և զորակցում բուժաշխատողներին:
Շատ են նաև մարդիկ, ովքեր դիմում են հոգևորականներին` Բժշկության կարգ կատարելու ակնկալիքով՝ այցելելու իրենց հիվանդներին
Ապրում ենք մի աշխարհում, որը լի է փորձություններով ու վախերով: Սակայն այսօրվա փորձությունը հաղթահարելը յուրաքանչյուրիս գործն է: Քրիստոնյան չի կարող անտարբեր լինել: Քրիստոնյան զինվոր է՝ զորացած Աստծո շնորհով, սիրով, աղթքով: Աղոթե՛նք բոլոր հիվանդների համար և հիշե՛նք՝ աղոթքը կյանք է, որը մենք ապրում ենք:
Բժշկության աղոթք
Տե՛ր, փարատիր Քո ժողովրդի հիվանդություններն ու ցավերը և բժշկիր: Աստված մեր, շնորհիր ամենքին կատարյալ առողջություն ամենահաղթ սուրբ Խաչիդ նշանով, որով վերացրիր մարդկանց տկարությունները և դատապարտեցիր մեր թշնամուն: Դու՛ ես մեր կյանքն ու փրկությունը բարերար, բազումողորմ Աստված, որ թողություն ես տալիս մեր մեղքերին և ազատում հիվանդություններից. ամեն:
Արարատյան Հայրապետական թեմի տեղեկատվական բաժին