Ստանձնե՛նք կյանքի մեր առաքելությունը
Ճշմարիտ ապաշխարությամբ կարելի է արժանանալ Աստծո ողորմածությանը: Այս խորհուրդն ունի Հին Կտակարանի 12 մարգարեներից Հովնան մարգարեի հիշատակության օրը: Այն Հայ Առաքելական Եկեղեցին տոնում է Առաջավորաց պահքի ընթացքում:
Հովնան մարգարեի օրինակը կարևոր դաս է մեզ համար: Պետք է կատարենք Աստծո կամքը, որ արժանանանք փրկության, նշում է Նոր Նորքի Ս. Աստվածածին եկեղեցու հոգևոր հովիվ Տեր Աշոտ քահանա Սաֆարյանը.
«Այնտեղ, որտեղ մեղքը ավելանում է, Աստծո շնորհը հեռանում է: Որտեղ ապաշխարում են և փնտրում Աստծո կամքը, ձգտում այն կատարել, այնտեղ ավելանում է Աստծո սերը, շնորհն ու առաջնորդությունը»:
Առաջավորաց պահքի նպատակը ապաշխարության կոչն է՝ հիշելով նաև Ս. Հովնան մարգարեի օրինակը:
Ապաշխարության մեծագույն օրինակը
Հովնան մարգարեն աստվածապաշտ մարդ էր: Նրան Տերը ընտրել էր, որ իր խոսքը հասցնի Նինվեի բնակիչներին, որոնք ապրում էին մեղքերի մեջ: Տեր Աշոտի խոսքով՝ նա առաջինն ուղարկվեց հեթանոսների մոտ՝ ապաշխարության կոչ հնչեցնելու:
Հին Կտակարանի «Հովնանի մարգարեություն»-ում նշվում է, որ Ս. Հովնանը սկզբում խուսափում է Աստծո կամքը կատարել: Փորձում է թաքնվել Թարսիս բնակավայրում: Փախուստի ճանապարհին ծովը փոթորկվում է, ու մարգարեն ստիպված խոստովանում է նավի անձնակազմին, որն հենց ինքն է նավաբեկության պատճառը: Նավաստիները ծովն են նետում Հովնանին: Նրան կուլ է տալիս հսկա կետը: Ձկան փորում սարսափած մարգարեն աղոթքով ու զղջումով խնդրում է՝ փրկություն: Երեք օր հետո ազատվում է «բանտարկությունից»:
Մարգարեն որոշում է կատարել իր առաքելությունը: Քարոզում է Նինվեում, տեղեկացնում է քաղաքի կործանման վտանգի մասին: Նինվեի բոլոր բնակիչները լսում են նրան, ապաշխարում ու աղոթքով փրկվում են կործանումից:
Քաղաքը փրկվում է, քանի որ Հովնանը ստանձնում է իր առաքելությունը, ընդգծում է Տեր Աշոտը.
«Նա փոխեց իր ընթացքը, վստահեց Աստծուն և Նրա ողորմածությամբ, օգնությամբ նինվեացիներն ապաշխարեցին»:
«Աստծո խնամքն ու ողորմածությունն ուղղված են ամբողջ մարդկությանը: Հովնանը տեսավ, թե որքան զորեղ է Տերը, որ կարող է մեկ մարդու միջոցով փոխել ամբողջ քաղաքի բնակիչների կյանքը: Սա ապաշխարության մեծագույն օրինակ է»,-բացատրում է Տեր Աշոտը:
Հովնան մարգարեն՝ Հիսուս Քրիստոսի նախատիպ
Քահանան նշում է, որ Հովնան մարգարեն եղավ Հիսուս Քրիստոսի նախատիպը: Նա 3 օր ու գիշեր մնաց ձկան փորում, իսկ Քրիստոսը՝ գերեզմանում, մինչև հարություն առնելը: Ի տարբերություն Հովնանի՝ Քրիստոսը ի սկզբանե չի խուսափում անարգանքից, խաչելությունից՝ հանուն մարդկանց փրկության:
«Որպեսզի մարդ հարազատանա Աստծո հետ, հարկ է, որ ապաշխարի, արժանի լինի Աստծո օրհնությանը, առաջնորդությանը»,-նկատում է Տեր Աշոտը:
Ս. Հովնանի օրինակը՝ դաս մեզ համար
Նինվեացիները, մարգարեի կոչը լսելով, ապաշխարեցին, սակայն այսօր շատերը գիտեն Տիրոջ պատգամների, նրա չարչարանքների ու խաչելության մասին, բայց շարունակում են մնալ մեղքի մեջ, ցավով է նկատում քահանան.
«Հովնան Մարգարեի օրինակով Աստված պատգամում է մեզ, որ մենք ճանաչենք մեր առաքելությունը, ստանձնենք այն և գիտակցենք, որ մեր կյանքի առաքելության ապահով և հաջող ընթացքը պայմանավորված է մեր ջանքերով, նաև Աստծո առաջնորդությամբ»:
Հոգևորականը հորդորում է՝ հետևել նինվեացիների օրինակին.
«Ապաշխարությունը կյանքը փոխելու ընթացք է, միտքը փոխելու ընթացք է»:
Անի Ավագյան
- 2024-01-26