Մայրաքաղաքի Սուրբ Երրորդություն եկեղեցու դահլիճում կրկին հավաքվել էին Արարատյան Հայրապետական թեմի երիտասարդները՝ մրցելու իրենց գիտելիքներով: Անցկացվեց ինտելեկտուալ փառատոն՝ «Մեր մեծերը»  խորագրով: 

«Միջոցառումը նվիրված է Թարգմանչաց տոնին: Երիտասարդները հավաքվել են՝ յուրահատուկ կերպով բացահայտելու մեր գեղեցիկ տոնը: Տեղի է ունենում փորձի փոխանակում, մասնակիցները ծանոթանում են, շփվում, նոր գիտելիքներ ստանում»,- իր խոսքում նշեց Սուրբ Երրորդություն եկեղեցու երիտասարդաց միության ատենապետ Էլեն Ծատուրյանը:

ԱՀԹ առաջնորդական փոխանորդ Գերաշնորհ Տեր Նավասարդ արքեպիսկոպոս Կճոյանի օրհնությամբ փառատոնը կազմակերպում է թեմի երիտասարդաց միությունների հոգևոր խորհուրդը՝ հոգևոր հովիվ Տեր Պետրոս ավագ քահանա Մալյանի ղեկավարությամբ։

«Ինտելեկտուալ փառատոնը նվիրված է մեր ինքնությանը: Գրերի գյուտով մենք դարձանք ազգ, մեզ մոտ բարձրացավ ազգային գիտակցությունը: Այս փառատոնը կարևոր միջոցառում է՝ երիտասարդներին դաստիարակելու համար: Այստեղ հավաքված երիտասարդների մեջ արմատացած է ազգային ինքնության գաղափարը»,- նշեց Տեր Պետրոսը:

Սա 2024 թվականի չորրորդ փառատոնն էր: 3 փուլից բաղկացած խաղին մասնակցեց թեմի 11 երիտասարդաց միություն։ Հաղթական գավաթը վերցրեց Արաբկիրի Սուրբ Խաչ եկեղեցու երիտասարդաց միության «Ստաուրոս» թիմը:  Երկրորդ հորիզոնականը զբաղեցրեց Նորք-Մարաշի Սուրբ Աստվածածին եկեղեցու «Գանձասար» երիտասարդաց միությունը: Անդամներից Անի Ոսկանյանը 3-րդ անգամ է մասնակցում խաղին: 

«Այս խաղերը ապահովում են մեր ինտելեկտուալ ժամանցն ու առիթ դառնում, որ ուսումնասիրենք շատ նոր նյութեր: Ինձ համար շատ օգտակար են այս խաղերը, քանի որ ինքս շատ բան եմ սովորում»,- նշեց Անին:

Փառատոնին 3-րդ հորիզոնականը զբաղեցրեց Զորավոր Սուրբ Աստվածածին եկեղեցու՝ «Զորավոր» երիտասարդաց միությունը:

Հաղթողներին տրվեցին պատվոգրեր ու մրցանակներ: Խրախուսական նվերներ տրվեցին այլ թիմերի ևս: Խաղի համար հարց էր պատրաստել նաև Գերաշնորհ Տեր Նավասարդ արքեպիսկոպոս Կճոյանը։ 
 

Արարատյան Հայրապետական թեմի տեղեկատվական բաժին