Կիրակնօրյա դպրոցների սաները ստուգեցին իրենց գիտելիքները
Մարտի 29-ին Արարատյան Հայրապետական թեմի առաջնորդական փոխանորդ Գերաշնորհ Տեր Նավասարդ արքեպիսկոպոս Կճոյանի հանդիսապետությամբ անցկացվեց վիկտորինա՝ թեմի Կիրակնօրյա դպրոցների սաների միջև։ Խաղի մասնակիցներին հյուրընկալել էր թեմի Սուրբ Երրորդություն եկեղեցին, որն ունի մեծ ու ընդարձակ հանդիսությունների սրահ։
Տերունական աղոթքով և Նավասարդ Սրբազանի օրհնությամբ մեկանակեց միջոցառումը։
Թեմի Քրիստոնեական դաստիարակության կենտրոնի տնօրեն Հասմիկ Նալբանդյանը ներկայացրեց խաղի կանոնները՝ նշելով, որ թիմերի համար նախատեսված է 3 փուլ և ևս 1 փուլ՝ թիմերի ավագներից լավագույնին ընտրելու համար։
Վիկտորինայի ժյուրին նախագահում էր Նավասարդ Սրբազանը։ Ժյուրիի կազմում ընդգրկված էին Ս․ Երրորդություն եկեղեցու հոգևոր հովիվ Տեր Արարատ քահանա Օրդոյանը, Ավանի Ս․ Աստվածածին եկեղեցու խորհրդակատար Տ․ Հուսիկ քահանա Դոխոլյանն ու Առաջնորդանիստ Ս․ Սարգիս եկեղեցու հոգևոր սպասավոր Հովհաննես սարկավագ Ներսիսյանը։
Խաղին մասնակցում էր 9 թիմ։ Երեք փուլերի արդյունքում հաղթող ճանաչվեց Կաթողիկե Ս․ Աստվածածին և Ս․ Աննա եկեղեցիների կիրակնօրյա դպրոցի թիմը։ Երկրորդ տեղը գրավեց Զորավոր Ս․ Աստվածածին եկեղեցու թիմը։ Երրորդ հորիզոնականը զբաղեցրեց Ս․ Երրորդություն եկեղեցու թիմը։ Վերջինիս ավագն էլ հաղթեց ավագների մրցույթում՝ ճիշտ պատասխանելով Նավասարդ Սրբազանի պատրաստած հատուկ հարցերին։
Ամփոփման ժամանակ Սրբազան հայրը շնորհավորեց բոլոր մասնակիցներին ու շնորհակալություն հայտնեց ուսուցիչներին իրենց մեծ վաստակի համար, որ ներդրել են մատաղ սերնդին կրթելու սուրբ գործի մեջ։ Սրբազան հայրը մասնավոր շնորհակալություն հայտնեց Հասմիկ Նալբանդյանին՝ երկար տարիներ նվիրված աշխատանքի ու մեծ ջանքերի համար, որոնց պտուղներն օգուտ են բերում մեր թեմին ու մեր ազգին․ «Սիրելի՛ ուսուցիչներ ու կիրակնօրա դպրոցի սաներ, շնորհավորում եմ պարգեւատրվողներին եւ մաղթում եմ, որպեսզի դուք, որպես Աստծո կողմից արարված մաքուր անոթներ, լցվեք աստվածաշնչյան գիտելիքով ու պատգամներով, մեր Եկեղեցու օրհնությամբ։ Ջանացեք հոգևոր ու ճշմարիտ գիտելիքներ ձեռք բերել, էլ ավելի լավ պատրաստվեք, որ հաջորդ խաղերին ևս պայծառ փայլեք ձեր իմացությամբ»։
Թեմի կիրակնօրյա դպրոցներում 600-ից ավելի պատանիներ ստանում են հոգևոր գիտելիքներ, մասնակցում են ուխտագնացությունների, այցելում են թանգարաններ, կազմակերպում են տարբեր միջոցառումներ։ Դպրոցներում դասավանդում են հատուկ վերապատրաստում անցած ուսուցիչները։
Արարատյան Հայրապետական թեմի տեղեկատվական բաժին
- 2025-03-31