Պահքը դեղամիջոց է, որ հաղթահարենք մեր վախերը, բժշկենք մեր հոգին
Մարտի 3-ից մեկնարկել է Մեծ Պահքը: Սուրբ Երրորդություն եկեղեցու հոգևոր հովիվ Տեր Արարատ քահանա Օրդոյանի հետ մեր զրույցը պահքի կարևորության մասին է:
Պահքը՝ դեղամիջոց մեր տագնապների ու վախերի համար
-Այսօր մեր մեջ տարածված են վախեր, տագնապներ: Մարդկանց մեջ առկա լարվածությունն առաջացնում է ագրեսիա, մեկը մյուսի նկատմամբ անհանդուրժողականություն: Վախը հավատքի թերացման արդյունք է: Պետք է ամեն մեկս փորձենք մեր մեջ գտնել խնդիրը, իսկ բուժումը կգտնենք պահքի միջոցով: Պահքը լավ դեղամիջոց է յուրաքանչյուրիս համար, որ հաղթահարենք մեր վախերը, բժշկենք մեր հոգին:
Պահքը՝ միջոց վերադառնալու
-Այսօր տեսնում ենք, որ տարածված է ատելությունը, նենգությունը, տարբեր վայրերում պատերազմներ են, որովհետև հեռացել ենք Տիրոջից, համահունչ չենք եղել Աստծո արարչագործությանը, կտրվել ենք մեր արմատներից: Մենք ենք ընտրել այս ճանապարհը: Միածին Որդին եկավ աշխարհ մեզ փրկելու: Աստծո Որդին սովորեցրեց՝ ինչպես ապրել, և մեզ փոխանցվեց փրկության ճանապարհը: Պահեցողությամբ մենք թարմացնում ենք մեր հիշողությունը, փորձում վերադառնալ այն երանելի վայրը, որտեղից մարդը վտարվել է: Պահքի միջոցով փորձում ենք հոգևոր աճ ունենալ, զարթոնք ապրել:
Առիթ՝ միավորվելու, միմյանց նկատմամբ սերը զորացնելու
-Յուրաքանչյուր ընտանիք ազգի մի մասնիկն է: Մեր երկիրն էլ մի մեծ ընտանիք է: Եթե մեր ընտանիքներում լինի համերաշխություն, սեր, եթե կարողանանք ազգովի գտնել սիրո ճանապարհը, որը մեզ կմիավորի, կզգանք Տիրոջ ջերմությունը: Յուրաքանչյուր դժվարություն հաղթահարելի է: Պատկերացնո՞ւմ եք ազգովի մեկ նպատակի համար աղոթք անենք: Այն կդառնա զորավոր աղոթք՝ վերադարձի: Այն կդառնա առիթ միավորվելու, միմյանց նկատմամբ սերը զորացնելու, վերարժևորելու մեր սրբությունները: Երբ կա ցանկություն, որևէ խոչընդոտ չի կարող խանգարել մեզ: Միասնական պահեցողության միջոցով, աղոթքով պետք է զորացնել մեր հոգին և միասնական աղոթքով դիմել Տիրոջը: Երբ կարողանանք համախմբվել, դառնալ մեկ միտք, Տիրոջից ներում խնդրել մեր հանցանքների, իրար չսիրելու և իրար վնասելու համար, Աստված կգա մեզ ընդառաջ:
Ազգային զարթոնքի ճանապարհը
-Ո՞րն է մեր՝ քրիստոնյաներիս նպատակը՝ հասնել Երկնային արքայության: Մեր նպատակն իրականացնելու համար՝ պետք է ունենանք ուժեղ կամք: Պահքի միջոցով մենք զորացնում ենք մեր կամքը, հրաժարվում վատ ցանկություններից, մտքերից, սովորություններից: Եթե այս ճանապարհով անցնի մեր ազգը, տարիներ անց կունենանք հոգևոր աճ, ազգային զարթոնք, իսկ այդ ճանապարհով ընթանալու համար՝ մեզ անհրաժեշտ է ցանկություն ու սեր:
Պատրաստեց Անի Ավագյանը
- 2025-04-02